ରାମ ମନ୍ଦିର ପ୍ରତିଷ୍ଠା ପୂର୍ବରୁ ଏବେ ୫୦୦ ଟଙ୍କିଆ ନୋଟର ଫଟୋ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । ଏହି ନୋଟ୍ ଭାରତୀୟ ରିଜର୍ଭ ବ୍ୟାଙ୍କ ଜାରି କରିଛି ବୋଲି ଗୁଜବ ହେଉଛି । ସୋସିଆଲ ମିଡିଆରେ ଭାଇରାଲ ହେଉଥିବା ୫୦୦ ନୋଟର ସାମ୍ନାରେ ରାମଲାଲାଙ୍କ ଫଟୋ ଏବଂ ପଛରେ ରାମ ମନ୍ଦିରର ଫଟୋ ଥିବା ବେଳେ ସତ କଥା ହେଉଛି ଏହି ନୋଟକୁ କେହି ଏଡିଟ୍ କରି ଅପଲୋଡ କରିଛନ୍ତି । ଆଜ୍ଞା ହଁ ବନ୍ଧୁଗଣ ଜାନୁଆରୀ ୨୨ରେ ଅଯୋଧ୍ୟାରେ ହେବ ରାମଲାଲାଙ୍କ ପ୍ରାଣ ପ୍ରତିଷ୍ଠା ଉତ୍ସବ।
୫ଶହ ବର୍ଷ ପରେ ମନ୍ଦିର ପ୍ରତିଷ୍ଠା ହେଉଥିବାରୁ ନିଜ ଜନ୍ମସ୍ଥଳୀକୁ ଫେରିବେ ପ୍ରଭୁ ରାମଲାଲା । ଏହାରି ଭିତରେ ରାମ ମନ୍ଦିର ଓ ଅଯୋଧ୍ୟାକୁ ନେଇ ବହୁ ରୋଚକ ଖବର ସୋସିଆଲ ମିଡ଼ିଆରେ ଭାଇରାଲ ହେଉଛି । ଅନେକ ଭୁଲ ଓ ବିଭ୍ରାନ୍ତିକର ଖବର ମଧ୍ୟ ଭାଇରାଲ ହେବାରେ ଲାଗିଛି । ଏହିପରି ଏକ ଭୁଲ ଖବର ଏବେ ସାମ୍ନାକୁ ଆସିଛି । ୫୦୦ ଟଙ୍କିଆ ନୋଟରେ ଲାଲକିଲ୍ଲା ବଦଳରେ ରାମ ମନ୍ଦିର ଓ ମହାତ୍ମା ଗାନ୍ଧୀଙ୍କ ସ୍ଥାନରେ ପ୍ରଭୁ ରାମଙ୍କ ଫଟୋ ଛପାଯାଇଛି । ଏହା ଖୁବ ଭାଇରାଲ ହେଉଥିବା ବେଳେ ଏହି ଖବର ସମୂର୍ଣ୍ଣ ମିଛ ବୋଲି ଜଣାପଡିଛି ।
ପ୍ରଭୁ ରାମଙ୍କ ମନ୍ଦିରର ଉଦଘାଟନ ତାରିଖ ପାଖେଇ ଆସୁଥିବାରୁ ରାମ ମନ୍ଦିରର, ପ୍ରଭୁ ରାମଙ୍କ ପ୍ରତିମା ତଥା ଭଗବାନ ଶ୍ରୀରାମଙ୍କ ସହ ଜଡିତ ଅନେକ ଫଟୋ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ଏହି ସମୟରେ ସୋସିଆଲ ମିଡ଼ିଆରେ ଏକ ସ୍ୱତନ୍ତ୍ର ଫଟୋ ଭାଇରାଲ ହେବାରେ ଲାଗିଛି ଯେଉଁଥିରେ ୫୦୦ ଟଙ୍କିଆ ନୋଟ ଅଛି । ଏହି ୫୦୦ ଟଙ୍କିଆ ନୋଟକୁ ଦେଖି କେହି କେହି କହୁଛନ୍ତି ରାମଲାଲାଙ୍କ ପ୍ରାଣ ପ୍ରତିଷ୍ଠା ସହିତ ନୂଆ ୫ଶହ ଟଙ୍କିଆ ନୋଟ ମାର୍କେଟକୁ ଆସିବାକୁ ଯାଉଛି । ଅନେକ ଲୋକ ଏହାକୁ ସେୟାର କରିଥିବା ଦେଖିବାକୁ ମିଳିଛି ।
ତେବେ ଏହା ସମୂର୍ଣ୍ଣ ରୂପେ ଭୁଲ । ସୂଚନାଯୋଗ୍ୟ ପ୍ରଥମେ ୨୦୨୪ ଜାନୁଆରୀ ୧୪ରେ ରଘୁନ୍ ମୁର୍ତ୍ତୀ ନାମକ ଜଣେ ଏକ୍ସ ୟୁଜରଙ୍କ ଦ୍ବାରା ସେୟାର କରାଯାଇଥିଲା । ଯାହାପରେ ଏହି ଫଟୋଗୁଡ଼ିକ ଭାଇରାଲ ହୋଇଥିଲା ଏବଂ ସଙ୍ଗେ ସଙ୍ଗେ ନିଆଁ ପରି ବ୍ୟାପିଗଲା । ଯେତେବେଳେ ୫୦୦ ଟଙ୍କିଆ ନୋଟରେ ଏହି ନକଲି ଫଟୋ ଭାଇରାଲ ହେବାରେ ଲାଗିଲା, ଉପଭୋକ୍ତା ନିଜେ ଅନ୍ୟ ଏକ ପୋଷ୍ଟ କରିଥିଲେ ଏବଂ ଭୁଲ ତଥ୍ୟ ବିସ୍ତାର କରିବା ପାଇଁ ତାଙ୍କ ସୃଜନଶୀଳ କାର୍ଯ୍ୟକୁ ବ୍ୟବହାର ନକରିବାକୁ ଲୋକଙ୍କୁ ନିବେଦନ କରିଥିଲେ।
