ଲୋକମାନଙ୍କର ବିଭିନ୍ନ ପ୍ରକାରର ହବିଥାଏ , କେହି କେହି ମୁଦ୍ରା ସଂଗ୍ରହ କରିବା ବେଳେ ଆଉ କେତେକ ଦେଶ ତଥା ବିଦେଶ ଭ୍ରମଣ କରି ନିଜର ହବି ପୂରଣ କରନ୍ତି । କିନ୍ତୁ କେରଳର ଜଣେ 71 ବର୍ଷିୟ ମହିଳା ବିଭିନ୍ନ ଗାଡି ଚଲାଇବାକୁ ଭଲ ପାଆନ୍ତି । କୋଚିର ଥେପୁମ୍ପଡିର ବାସିନ୍ଦା ରାଧାମଣି , ଯିଏ JCB ଠାରୁ କ୍ରେନ ଏବଂ ରୋଡ ରୋଲର, ଟ୍ରକ ଏବଂ ଟ୍ରାକ୍ଟର ପର୍ଯ୍ୟନ୍ତ ସବୁକିଛି ଚଲାଉଛନ୍ତି । କେବଳ ସଉକ ଭାବରେ ନୁହେଁ , ତାଙ୍କ ପାଖରେ ଏହି 11 ଟି ଭିନ୍ନ ଭିନ୍ନ ଯାନ ଚଲାଇବାର ଲାଇସେନ୍ସ ମଧ୍ୟ ଅଛି । ସମ୍ଭବତ ରାଧାମଣି କେରଳର ଏକମାତ୍ର ମହିଳା ଯାହା ପାଖରେ 11 ଟି ଭିନ୍ନ ଭିନ୍ନ ଯାନ ଚଲାଇବାର ଡ୍ରାଇଭିଂ ଲାଇସେନ୍ସ ଅଛି।
ପ୍ରଥମ ଲାଇସେନ୍ସ 1988 ମସିହାରେ ମିଳିଥିଲା :
ରାଧାମଣି 30 ବର୍ଷ ବୟସରେ ଗାଡି ଚଲାଇବା ଶିଖିଲେ । ସେ ତାଙ୍କ ପିତାଙ୍କଠାରୁ ଗାଡି ଚଲାଇବା ପାଇଁ ତାଲିମ ନେଇଥିଲେ ଏବଂ ସେହି ଦିନଠାରୁ ତାଙ୍କର ଡ୍ରାଇଭିଂ କରିବାର ହବି ଆରମ୍ଭ ହୋଇଥିଲା । 1988 ମସିହାରେ ତାଙ୍କୁ ବସ ଏବଂ ଟ୍ରକ ଚଲାଇବା ପାଇଁ ଲାଇସେନ୍ସ ଦିଆଯାଇଥିଲା , ଏହାପରେ ସେ ଥେପୁମ୍ପଡିରୁ ଚେରଥଲା ପର୍ଯ୍ୟନ୍ତ ପ୍ରଥମ ଥର ପାଇଁ ଏକ ବସ ଚଲାଇଲେ । ଏହି ସଫଳତା ପାଇଁ ପରିବହନ ବିଭାଗ ତାଙ୍କର ଉଚ୍ଚ ପ୍ରଶଂସା କରିଥିଲା । ଗତ ବର୍ଷ ତାଙ୍କୁ ବିପଜ୍ଜନକ ସାମଗ୍ରୀ ପରିବହନ କରୁଥିବା ଗାଡି ଚଳାଇବାର ଲାଇସେନ୍ସ ମିଳିଛି ।
A to Z ଡ୍ରାଇଭିଂ ସ୍କୁଲ ପରିଚାଳନା କରନ୍ତି :
ସେ ଗାଡି ଚଲାଇବା ବ୍ୟତୀତ ଅନ୍ୟମାନଙ୍କୁ ଡ୍ରାଇଭିଂ ଶିଖାଇବାକୁ ମଧ୍ୟ ଭଲ ପାଆନ୍ତି । 1970 ମସିହାରେ ତାଙ୍କ ସ୍ୱାମୀଙ୍କ A to Z ଡ୍ରାଇଭିଂ ସ୍କୁଲ ଆରମ୍ଭ କରିଥିଲେ ଏବଂ 2004 ରେ ତାଙ୍କ ମୃତ୍ୟୁ ପରେ ରାଧାମଣି ଏହି ବିଦ୍ୟାଳୟର ପରିଚାଳନା କରୁଛନ୍ତି । ତାଙ୍କ ଡ୍ରାଇଭିଂ ସ୍କୁଲରେ ବିଭିନ୍ନ ଯାନବାହାନ ଚଲାଇବାର ତାଲିମ ଦିଆଯାଏ , ଯଦିଓ ବର୍ତ୍ତମାନ ସେ ଅନଲାଇନ କ୍ଲାସ ନେଉଛନ୍ତି ଏବଂ ତାଙ୍କ ପରିବାର ତାଙ୍କୁ ଏହି ଡ୍ରାଇଭିଂ ସ୍କୁଲ ଚଲାଇବାରେ ସାହାଯ୍ୟ କରୁଛନ୍ତି । ସେ ମଧ୍ୟ ବର୍ତ୍ତମାନ ସୁଦ୍ଧା ଅଧ୍ୟୟନ ଜାରି ରଖିଛନ୍ତି ଏବଂ ସେ ମେକାନିକାଲ ଇଞ୍ଜିନିୟରିଂରେ ଡିପ୍ଲୋମା କରୁଛନ୍ତି ।
